Lesti l-kameras tiegħek! L-EEA tniedi l-kompetizzjoni fotografika tal-2023 ZeroWaste PIX

L-għan ta’ ZeroWaste PIX huwa li titqajjem sensibilizzazzjoni u tkun ispirata bidla, murija permezz ta’ ritratti, kemm jekk hija immaġni ta’ fabbriki, miżbliet kif ukoll ġnien komunitarju li jgħaqqdu lin-nies flimkien madwar sens ta’ skop kondiviż. 

Is-sistemi ta’ produzzjoni u t-tendenzi ta’ konsum tagħna huma aspetti vitali tal-ekonomija u tal-għajxien tagħna. Bħala konsumaturi, ingawdu għadd kbir ta’ konvenjenzi u benefiċċji għall-kwalità tal-ħajja tagħna minħabba l-produzzjoni industrijali. Madankollu, nafu li dan jiġi bi spiża kbira għall-ambjent tagħna u dejjem aktar għas-saħħa u l-benesseri tagħna stess. Is-sistemi ta’ produzzjoni u ta’ konsum tagħna wasslu għal żieda fit-tniġġis u estrazzjoni tar-riżorsi bla waqfien, li joħolqu degradazzjoni fin-natura tagħna u jikkawżaw telf tal-bijodiversità. 

Ir-rebbieħ ta’ kull kategorija se jirċievi premju fi flus kontanti ta’ EUR 1,000. Premjijiet addizzjonali se jingħataw lill-aħjar entrata taż-żgħażagħ kif ukoll lir-ritratt favorit tal-pubbliku, fejn dan jiġi determinat b’votazzjoni online. 

Il-parteċipanti għandhom sat-Tlieta, 3 ta’ Ottubru 2023 biex jissottomettu r-ritratti tagħhom. L-entrati rebbieħa se jitħabbru fl-10 ta’ Novembru 2023. 

Min jista' jipparteċipa? 

Il-parteċipanti jrid ikollhom mill-inqas 18-il sena u jkunu ċittadini ta’ wieħed mit-32 pajjiż membru tal-EEA jew 6 pajjiżi li jikkooperaw, inklużi s-27 Stat Membru tal-UE, l-Iżlanda, il-Liechtenstein, in-Norveġja, l-Iżvizzera, it-Turkija, l-Albanija, il-Bożnija-Ħerzegovina, il-Kosovo*, il-Montenegro, il-Maċedonja ta’ Fuq, u s-Serbja. 

*Din id-deżinjazzjoni hija mingħajr preġudizzju għall-pożizzjonijiet dwar l-istatus, u hija konformi mal-UNSCR 1244 u l-Opinjoni tal-QIĠ dwar id-Dikjarazzjoni ta’ Indipendenza tal-Kosovo.