It-tibdil fil-klima, kif iħalli impatt fuq is-saħħa u l-benesseri tiegħi?

Ir-rapport tal-EEA dwar it-Tibdil fil-klima bħala theddida għas-saħħa u l-benesseri fl-Ewropa: il-fokus fuq is-sħana u l-mard infettiv jiddeskrivi t-theddida kkawżata minn temperaturi għoljin fit-tul li juru kif dawn iwasslu għal għadd akbar ta’ fatalitajiet u tnaqqis fil-produttività tax-xogħol. Proporzjonijiet ogħla ta’ mwiet minn mard kardijaku u respiratorju huma rreġistrati matul mewġiet ta’ sħana, speċjalment fost gruppi vulnerabbli, u l-impatt huwa aggravat mill-effett gżira ta' sħana urbana. 

Il-mard infettiv sensittiv għall-klima huwa theddida emerġenti oħra. Il-kundizzjonijiet klimatiċi qed isiru aktar adattati għall-emerġenza u t-trażmissjoni ta’ mard infettiv sensittiv għall-klima bħall-malarja, id-deni dengue jew id-deni tal-Punent tan-Nil, u qed jespandu wkoll ir-riskju ta’ trażmissjoni lejn żoni tal-Ewropa li qabel ma kinux affettwati. L-istaġun itwal tat-trażmissjoni u d-distribuzzjoni usa’ tat-trasportaturi jżidu t-tifqigħat lokali. 

Ir-rapport tal-EEA “Responding to climate change impacts on human health in Europe: focus on floods, droughts and water quality” (Rispons għall-impatti tat-tibdil fil-klima fuq is-saħħa tal-bniedem fl-Ewropa: fokus fuq l-għargħar, in-nixfiet u l-kwalità tal-ilma) jiġbed l-attenzjoni għall-impatti relatati mal-ilma tat-tibdil fil-klima fuq is-saħħa u l-benesseri. Madwar 12 % tal-popolazzjoni tal-Ewropa tgħix f’żoni potenzjalment suxxettibbli għall-għargħar tax-xmajjar u madwar 30 % tan-nies fin-Nofsinhar tal-Ewropa jiffaċċjaw stress tal-ilma permanenti. Iż-żieda fit-temperaturi tal-arja u tal-ilma tiffaċilita wkoll it-tkabbir tal-patoġeni, u b’hekk jiżdied ir-riskju ta’ mard li jittieħed mill-ilma.