Introduzzjoni dwar il-kimiċi

Biddel il-lingwa

Immodifikat l-aħħar: Nov 16, 2011 04:23 PM

L-inġenjożità tal-bniedem ipproduċiet sew aktar minn 100 000 kimika ġdida — sustanzi li qatt qabel ma kienu parti mill-ambjent terrestri.

Xi wħud, bħas-sustanzi li fihom metalli tqal u 'sustanzi organiċi persistenti li jniġġsu', kienu magħrufa għal ħafna snin bħala perikolużi, filwaqt li reċentement tqajmu biżgħat dwar ħafna aktar. Madankollu, għal ħafna minn dawn il-kimiċi, aħna sempliċement ma nafux kif jgħaddu mill-ambjent, jekk dawn humiex akkumulati, imxerrda jew ittrasformati, u kif jaffettwaw lill-organiżmi ħajjin f'konċentrazzjonijiet differenti.

Aħna nafu li l-emissjonijiet ta' ħafna kimiċi, magħrufa bħala perikolużi, naqsu, iżda li hemm ħafna żoni fejn il-konċentrazzjonijiet tagħhom fl-ambjent għadhom għoljin wisq. Nafu wkoll li l-industrija tal-kimiċi tal-Ewropa qed tikber b'mod aktar mgħaġġel mill-ekonomija sħiħa, u qed iżżid il-fluss ta' kimiċi fl-ekonomija Ewropea. Inizjattivi maħsuba biex jitnaqqas dan il-fluss iridu jkopru l-katina kollha: il-prodotturi primarji fl-industrija tal-kimiċi, is-setturi kollha tal-industrija, il-konsumaturi individwali, is-settur tar-rimi tal-iskart, u aktar.